Arestado ang isa ka force multiplier nga nagpakuno-kuno nga isa ka abogado kag nagpasalig nga magabulig sa isa ka beautician kabaylo sang P30,000.
Ang tagreklamo ang ginkilala kay John Mark Liboon, 30 anyos, residente sang Purok Lacson, Brgy Dulao, siyudad sang Bago samtang ang suspect naman amo si Jonelly Lacson, 41 anyos residente sang Purok Sebastian, Brgy. Sum-ag, Bacolod City.
Sa interview sang Bombo Radyo kay PCapt Rondyl Tapang, station commander sang Police Station 9, nagkadto sa parlor ni Liboon ang suspek nga si Lacson para magparebond kag didto sila nakaistoryahanay sang namitlang sang complainant nga nagakinahanglan ini sang bulig nga mapagwa ang iya nga partner nga nakahunong sa Bureau of Jail Management and Penology Bacolod City.
Diri na naghambal si Lacosn nga isa ini ka abogado apang sang sila na ang nagtransakyon, kulang ang kwarta nga nahatag ni Liboon kag didto na nga nagduda ini kag nagpalapit sa mga kapulisan.
Ginpatigayon kahapon ang entrapment operation kun sa diin naaresto ang suspetsado.
Nahibaluan nga madamo sang naga-alegar sa social media nga nabiktima man sang suspetsado sa pangmodus sini.
Sa karun, ara na sa kustodiya sang Police Station 9 ang suspetsado.
