Nagapanawagan sang fuel discount paagi sa coupons ang mga sugar farmers bangod sa ginalauman nga dako nga pagsaka sa presyo sang produktong petrolyo.
Sa interview sang Bombo Radyo Bacolod kay United Sugar Producers Federation (UNIFED) President Manuela Lamata, nagpadala ini sang sulat kay President Ferdinand “Bongbong” Marcos Jr nga mahatagan sang coupon discount ang mga farmers.
Ini bangod ang mga farm machineries ang nagagamit man sang diesel.
Isa na diri ang irrigation pumps ilabi na sa tion sang summer season, kag ang ginakahangaw-an nga posibilidad sang El Niño.
Bangod sa pagmahal sang fuel products, ginalauman na nila nga magadangat sa 30 tubto 35 porsyento ang isaka sang ila production cost.
Ginapangamuyo na lamang ni Lamata nga madasig nga matapos ang gyera sa Middle East agud indi na maglawig ang fuel crisis.
Suno diri, kun magapadayun pa ang pagtimbook sang fuel prices, wala na sang trucking nga magabyahe kag indi naman makagaling ang mga sugar milling companies.
Pahayag ni Lamata nga dako ang epekto sini sa sugar industry ilabi na nga nadungan ang krisis sa peak sang milling season.
Ang millgate price sang kalamay ang yara sa karun sa level nga P2,300 sa isa ka sako.
Suno diri, ang presyo ang nagsaka sang tinalikdan sa P2,500 apang gilayon man nga nagpanaog.
