Preparado na ang mga buluthuan sa Negros Occidental sa full implementation sang face-to-face classes subong nga adlaw.
Sa interview sang Bombo Radyo kay Ian Arnold Arnaez, public information officer sang Department of Education Division of Negros Occidental, madugay na nga nakapreparar ang mga public schools sa probinsya apang bangud sa paglaslas sang Bagyo Paeng sang tinalikdan nga semana, ginalauman nga sila ang liwat ang magapaninlo bangud may mga eskwelahan nga ginbaha.
Apisar sini, suno kay Arnaez, kalabanan ang preparado na sa pagbukas sang full face-to-face classes.
May mga eskwelahan naman nga ginakulang sang mga classrooms kag mga manunudlo apang wala man sang may nagpalab-ot sa regional office nga luyag nila magpa-exempt sa full implementation sini.
Aminado man si Arnaez nga medyo mabudlay para sa isa ka manunudlo kun nagadangat sa 50 ang iya estudyante apang nagapati ini nga may yara sang tagsa-tagsa ka mga stratehiya ang isa kag isa agud makatudlo sang maayo.
Nagapanugyan man ini sa mga estudyante kag manunudlo nga magpadayon lamang apisar sang mga kabudlayan nga ginapangatubang.
