Ginahingyo sang pumuluyo sa Lopez Jaena Street, Barangay 27, siyudad sang Bacolod nga mahatagan sila sang tsansa sa gihapon nga mag-display sang ila mga baligya, matapos nga ginpatigayon ang road clearing sang Bacolod Traffic Authority Office kahapon.
Sa interview sang Bombo Radyo kay Ramero Montano, manugbaligya sang furniture nga naga-puyo sa kilid sang dalan, wala nagpahibalo ang mga otoridad sang clearing operations nga ila ginpatigayon, nga gilayon lang sila nanghawan apang wala man sila nagreklamo kag nagdesyon nga mangita na lang sang bag-o nga sayluhan.
Suno kay Montano, yara man sa insakto ang mga otoridad nga magutok gid man ang dalanon.
Apang may yara man sila nabaton nagligad nga mga binulan nga sulat nga ginpirmahan kaangay sa road widening.
Pahayag ni Montano, ginpahigad nila ang ila mga baligya kun magutok ang trapiko para indi magamo sa dalan.
Apang ginapangyo nila nga mahatagan sila gihapon sang lugar nga plastaran sang ila negosyo apisar pa nga maghalin sila didto.
Ginpahayag man sini nga ila pa ginatrabaho ang pagsalin sang ila mga gamit lakip na ang ila motorsiklo nga na parking sa dalan, ang manok kag pato nga ila ginatigana sa tion nga wala gid sila.
Samtang indi lamang ang mga baligya ang nagapagutok sa dalanon sang Barangay 27, bangod nga madmao pa sang panimalay sa likod nga bahin, masami nga ginaparking sang mga pumulyo ang ila mga motorsiklo sa gwa, nga naga padugang gutok sa dalan, problema man sa karun ang mga kuryente nga nagaginamo kag manubo nga masami gaka-utod kun maglabay ang matag-as nga mga salakyan.
