Nagpabutyag sang padayon nga nagapamatok ang Group of 7 sa delikado nga paggamit sang China sang Coast guard kag maritime militia sini sa gina-agawan nga kadagatan kag padayon nga pagpamalabag sa iban nga pungsod sa hilway nga paglayag sa high seas.
Ini ang ginpahayag sang G7 sa isa ka statement nagikan sa ila nga summit nga ginpatigayon sa Apulia, Italy.
Suno sa G7 leaders, nagapabilin sila nga nagakahangawa sa sitwasyon sa disputed waters kag ginpanindugan ang ila nga pagpamatok sa bisan ano man nga unilateral attempt agud nga piliton nga bag-uhon ang status quo.
Nagpabutyag man ang G7 sang tuman nga kabalaka sa paggamit sang delikado maneuver kag water cannons batok sa mga barko sang Philippine Coast Guard, Bureau of Fisheries and Aquatic Resources (BFAR) kag chartered supply ships.
Kaangot sini, nagpanindugan ang G7 nga wala sang legal nga basehan para sa lapnagon nga maritime claims sang China sa disputed waters kag ginapamatukan man sang grupo ang militarisasyon sang China kag ang intimidation activities sa nasambit sa kadagatan.
Gin-emphasize man sang G7 ang UNCLOS kag sa 2016 ruling sa arbitral case sang Pilipinas nga nag-void sa 9-dash line claim sang China.
Ang pahayag nga ini sang G7 ang sa tunga sang pamahog sang China nga pagdakop sa mga foreign tresspasser sa ila ginaangkon nga kadagatan humalin subong nga adlaw Hunyo 15 kag pagaprisuhon sa sulod sang 60 ka adlaw nga wala nag-agi sa proceedings.
