Patay ang general foreman sang isa ka construction project matapos magbunggo ang ginamaneho nga motorsiklo sa pribado nga traditional jeepney sa Circumferential Road, Purok Villamar, Brgy Mandalagan, Bacolod City kapin alas-8:00 kaina sang aga.
Ang biktima ang ginkilala nga si Nestor Bancaya, 65 anyos, residente sang Kabankalan City apang nagaserbe nga construction foreman sa isa ka proyekto sa Brgy Mandalagan.
Ang motorsiklo ang nagabyahe padulong sa Kabankalan samtang ang pribado nga jeep ang padulong naman sa Brgy. E. Lopez, Silay City agud magbaligya sang mga santos.
Bangod sa head on collision, nawasak ang nawala nga bahin sang ulo sang jeep samtang dead on the spot naman si Bancaya.
Sa interview sang Bombo Radyo Bacolod kay Police Major Ramil Sarona, pagdangat sa kurbadahan nga dalan, nagtuyo nga mag-overtake ang motorsiklo sa isa ka wala matumod nga 4-wheeled vehicle.
Apang nadulaan sang control si Bancaya sa iya motorsiklo kag naglapaw sapihak nga lane rasun kun ngaa nagbunggu-anay sila sang jeep.
Bangod sa makusog nga impact, nakaangkon sang injuries si Bancaya sa lawas kag ulo apisar nga ini ang nakasuksok sang helmet nga amo ang gintunaan sang iya kamatayon.
Gilayon man nga nagpadulong sa area ang bata sang biktima nga si Jojo Bancaya.
Suno diri sa ila paghinun-anon sa pamilya, nabatun na sang mga ini ang insidente, kag aminado man ang mga ini nga may kapaltahan ang biktima.
Sa interview sang Bombo Radyo Bacolod kay John Abatayo, si Nestor Bancaya ang ila general foreman apang ang nagaserbe nila nga boss amo ang iya bata.
Suno diri nagahimos na sila padulong sa construction project sang nabatun sang bata sini ang tawag nga naaksidente ang iya amay.
Sa karun padayun pa ang imbestigasyon sang Traffic Enforcement Unit sang Bacolod City Police Office sa natabo nga insidente.
