Aminado ang General Manager sang Central Negros Electric Cooperative (CENECO) nga sila ang mabudlayan kun sa ila pa nga kamot nagcollapse ang power transformer sang Alijis Substation.
Sa interview sang Bombo Radyo Bacolod kay Atty. Arnel Lapore, wala sang may gusto nga magcollapse ang power tarnsformer kag bisan sa iya nga balay ang apektado man sang power outage.
Apang paathag sini nga kun wala sang kuryente, wala man nagadalagan ang metro gani maibanan man ang power rates nga bayaran sang konsumedor.
Aminado ini nga sa power distribution utilities, madamo gid sang factor nga sarang maka-apekto sa supply kaangay sang kalamidad kag ano paman nga insidente.
Apang ginapasalamatan na lamang sini nga nagtake-over na ang Negros Electric and Power Corporation (NEPC) bangod sila ang may financial kag equipment facilities.
Suno diri, kun CENECO sa karun ang naga-operate, sa karun sila ang nagasala-sala na kun ano ang himuon agud mabalik gilayon ang kuryente.
Dugang pa sini nga indi nila masarangan ang pagtakod sang bag-o nga linya sa anom tubtob pito ka kilometros agud maconnect ang Alijist Feeder 3 sa Murcia Feeder 1 sa sulod lamang sang inadlaw.
Ginapasalig sini nga sa tion nga amat-amat na nga maplastar ang 5-year rehabilitation plan sang NEPC, amat-amat naman nga mahilway ang mga power lines sa dugay-dugay nga power interruptions.
Samtang panindugan sini nga separado nga issue ang pagkadula sang tubig.
Ang dapat nga pamangkot suno diri amo ang tikang sang Primewater nga mapadayun ang pagsupply nga wala nagasalig sa NEPC.
Ginpaanggid sini sa mga hotel nga may generator nga ginagamit inkaso may magluntad nga brown-out, panugyan sini nga ang Primewater ang maghimo man sang kaangay nga tikang.
