Apat tanan ka structure ang nasunog sa nagluntad nga sunog sa Purok Riverside, Brgy Banago, Bacolod City, kaina alas- 8:37 sang aga.
Suno sa mga pumuluyo, may nabatian sila nga sunod-sunod nga lupok kag amo nga nag-ibwal ang kalayo sa H & D Hardware store nga ginapanag-iyahan ni Devilyn Maniego.
Sa inisyal, isa ang narekord nga injured nga amo si Prince Villarin, 24 anyos matapos mapaso sa tiil.
Nasunog ang duha ka commercial shpo kag duha ka balay kun sa diin nagdangat sa kapin P300,000 ang balor sang halit.
Suno sa mga pumuluyo nakahibalo lamang sila nga nagabaligya sang butane ang hardware store apang wala sila nakahibalo nga sila man ang nagarefill.
Sa interview kay Iya Cantes, wala na sini nahingagaw pa paggwa ang mga gamit sini sa sulod sang tyangge bangod madasig ang paglapta sang kalayo.
Suno diri, nagarenta lamang ini sang balay kag nagpasalamat nga wala nalab-ot ang iya refrigerator kag computer.
Pahayag sini, wala siya sang ideya nga nagarefill sang butane ang katupad sini nga hardware store.
