Patay ang isa ka lalaki nga gin-alegar katapo sang New People’s Army (NPA) sa engkwentro nga nagluntad sa tunga sang makawala nga grupo kag tropa sang gobyerno sa Barangay Bi-ao, Binalbagan, Negros Occidental kaina mga alas 2:00 ang takna sang kaagahon, Enero 30, 2026
Sa interview sang Bombo Radyo Bacolod kay Lt Col. Zeigfred Tayaban, Commander sang 94th Infantry Battalion sang Philippine Army, may yara sila sang nabaton nga report nga may tuyo ang NPA nga sunugon ang mga heavy equipment nga ginagamit sa mga nagapadayon nga government projects sa bahin sang Barangay Bi-ao kag Himamaylan City, Negros Occidental.
Suno kay Tayaban, gilayon man sila nga nagresponde matapos mabaton ang impormasyon kag alas 2:50 ang takna kaina sang kaagahon, nagluntad ang engkwentro.
Suno sa commander sang 94th Infantry Battalion, ang engkwentro ang nagluntad matapos nga masugata sang tropa sang gobyerno ang rebelde nga grupo sa maligwin nga lugar.
Indi man matumod kun pila ka mga rebelde ang naengkwentro sang mga ini bangud madulom.
Nagdangat sa kapin napulo ka minutos ang gindugay sang engkwentro kun sa diin nagresulta sa isa ka lalaki ang patay kag narecover ang M16 rifle kag mga bala.
Wala naman sang nasamaran sa tropa sang gobyerno.
Sa karun padayon pa ang hot pursuit operations sang mga suldado agud nga makita ang iban pa nga rebelde sa lugar.
