BACOLOD CITY — Maga-antos ang komunidad sa tion nga batakon na ang ban sa open pit mining nga una na nga ginpaguwa ni anay Department of Environment and Natural Resources (DENR) Sec. Gina Lopez.
Sa exclusive interview sang Bombo Radyo Bacolod kay Lopez, ginpahayag sini nga “forever” ang pag-antos sang komunidad sa tion nga batakon na ang ban sa open pit mining bangud nga magaguba ini sang ginakuhaan sang tubig partikular ang mga suba bangud sang pagkutkot sa kabukiran.
Suno pa sa anay tiglikom, indi kinamatarong ang pagmina kundi pribiliheyo apang nagalapas ini sa constitutional rights sang mga Pilipino para sa matinlo kag healthy nga palibot.
Ginhatag na lamang sini nga halimbawa ang Marricalum Mining sa ciudad sang Sipalay nga kun sa diin suno diri, 500 ka beses nga mas mataas ang lebel sang toxicity sini kun ikumparar sa normal nga lugar.
Nagakahangawa si Lopez nga madayon ang pagbatak sang ban bangud ang executive director sang Mining Industry Coordinating Council (MICC) nga nagaduso sang pag-lift sang ban isa ka abogado nga nagatrabaho sang una sa mining firms.
Ginhatagan sang pagtamod ni Lopez nga indi na kinahanglan sang mga mining firms sang kwarta bangud manggaranon na ang mga ini apang ang mga pumuluyo nagakinahanglan sang tubig kag limpyo nga palibot.
Nahibaluan nga nagapanawagan si Lopez kay Presidente Rodrigo Duterte nga indi pagpahunugutan ang pagbatak sang ban sa open pit mining matapos nga ginapahayag nga ginapanumdom na sang MICC ang pagbatak sini.
