Ginabuwangan ukon ginpakalogan lang anay sang Department of Public Works and Highways (DPWH) ang bahin sang Bacolod Economic Highway (BANOCEH) bilang temporaryo nga solusyon sa pagbaha.
Sa interview sang Bombo Radyo Bacolod kay Engineer Leah Jamero, District Engineer sang Department of Public Works and Highways-Bacolod, ginabaha ang bahin sang BANOCEH nga yara sa Barangay Granada kag Mansilingan bangud nga ini ang naidalom na nga bahin kag kun mag-ulan nagatipon ang tubig.
Suno kay Jamero, bilang temporaryo nga solusyon ginabuwangan nila ini apang aminado man ini nga indi supisyente ang tikang ilabi na kun magdamol ang ulan.
Naghulam man sila sang backhoe agud nga mahimuan sang temporaryo nga kanal ang naidalom nga porsyon sang dalan agud nga may iligan ang tubig padulong sa outlet sa bahin sang Piquinto bridge sa Barangay Villamonte kag Barangay Felisa.
Ginpahayag man ni Jamero nga indi matapos tapos ubra ang BANOCEH bangud may mga porsyon nga wala pa nakumpleto ang procurement sang road right of way.
