Kapin sa 160 ka kahon sang smuggled cigarettes nga ginabanta nagabalor sang P16 million ang ginsurrender sang isa ka driver sa checkpoint sang Bacolod Police Station 6 sa Doña Juliana Avenue, brgy. Taculing, Bacolod City, sang Miyerkules, alas- 10:15 sang gab-i.
Ang driver ang ginkilala nga si Rene Talaman, 45 anyos, residente sang barangay Mambugsay, Cauayan; kag kaupod sini ang duha ka helper nga sanday Jaymar Salazar, 44 anyos, residente sang barangay Villamonte, Bacolod City kag Mike Concepcion, 46 anyos nga residente sang barangay Vista Alegre, Bacolod City.
Sa interview sang Bombo Radyo Bacolod kay Police Captain Peter John Ramos, Officer in Charge sang Bacolod Police Station 6, ginsugo si Talaman nga may ipick-up nga Isuzu 6-wheeler panel van nga nagduag sang green sa barangay Bata, Bacolod City apang sang ginlantaw sini ang unod sang salakyan, didto natukiban ang 160 ka master cases sang smuggled cigarettes.
Ang van naga-unod sang 102 master cases sang Tabaco brand cigarettes, 54 master cases sang Cannon brand cigarettes, kag 4 ka master cases sang Conrad brand cigarettes.
Ang isa ka master case naga-unod sang 50 ka ream nga may napulo ka pack.
Suno kay Ramos, sang nakita ni Talaman nga smuggled cigarettes ang ila ibyahe gilayon ini nga nagtawag sa iya employer.
Ginsugo siya sang iya employer nga isurrender sa kapulisan ang mga sigarilyo kag sang may nakita ini nga checkpoint, wala na siya nagduha-duha nga magpalapit.
