Aminado ang construction worker nga isa sa mga una nga nakakita sang bangkay sang 82 anyos nga nasapwan sa Prk NEDF, Brgy Handumanan, Bacolod City, nga makapila na nga ginsulod ang balay.
Ang biktima ang ginkilala nga si Seigfredo Magalona, 82 anyos.
Pahayag sang construction worker nga sila ang nagsulod sa trabaho alas-7:30 sang aga.
Ang balay nga anay boarding house ang ginapakay-o sang bata sang senior citizen nga yara sa abroad, kag ginpadugangan sang second floor.
Pag-abot, bukas na ang balay kag nagasiga man ang suga kag naga-andar ang electric fan.
Ang mga ini ang nagderetso saka sa ginakay-o nga ikaduha nga panalgan, kag magaplastar na kuntani sang mga extension sang kit-an ang biktima nga yara sa banyo, kag may-ara na sang mga dugo.
Gilayon man sila nga, nagpanaog kag nagreport sa pastor nga nagaserbe nila nga contractor.
Pahayag sang construction worker nga apisar pwede sila makatulog sa ginakay-o nga balay, sila ang nagapuli-puli bangod makaduha naman sila nga ginsulod sang kawatan.
Ang una nga ginkawat amo ang ila mga materyales, samtang welding machine naman sa ikaduha.
Gani ginalantaw nila nga mahimo ginsulod ang tigulang samtang naga-isahanon sa balay, ilabi na nga sang nasapwan ang bangkay sa CR sa sulod sang kwarto, ang doorknob sang kwarto ang nahigot sang alambre sa gwa.
May CCTV man suno diri sa balay, apang wala na nila gindetalye kun sa diin nakahamtang.
