Subong nga Miyerkules, ang Easterlies ukon ang mainit nga hangin gikan sa Dagat Pacifico ang padayun nga maga-apekto sa Central kag Southern Luzon pati na sa bilog nga Visayas.
Bangod sa Easterlies lauman ang magal-umon nga kalangitan kag lapta lapta nga mga pag-ulan sa Metro Manila, Calabarzon, Bicol Region, Marinduque, Oriental Mindoro, Isabela, Aurora, Bulacan kag Nueva Ecija sa bahin sang Luzon.
Kasubong man ang mabatyagan nga tiyempo sa Aklan, Capiz, Bohol kag Cebu bangod man sa epekto sang Easterlies sa Visayas.
Maga-epekto naman ang Northeasterly Windflow sa Extreme Northern Luzon nga magadala sang mahinay nga mga pag-ulan ukon pagpanalithi partikular na sa Batanes, Cagayan, Apayao kag Ilocos Norte.
Mangin makanay naman ang panahon sa nabilin nga bahin sang pungsod, apang lauman nga mataas man ang tyansa sang tumalagsahon kag makadali nga pag-ulan ukon localized thunderstorms pagdangat sang hapon kag gab-i.
Sa pihak nga bahin, nagsaka na ang tyansa nga mangin isa ka Bagyo ang ginamonitor nga Low Pressure Area sa gwa sang Philippine Area of Responsibility sa masunod nga 24 tubtob 48 oras.
Ang LPA ang ulihi nga nasiplatan sa 1,765 km sa nasidlangan sang Northeastern Mindanao.
Ginalantaw nga ini ang magasulod sa PAR bwas nga pangalanan nga Bagyo RAMIL.
Sa iya forecast track, ginalantaw nga ini ang magapalapit sa Northern Luzon kag magadala sang maulanon nga panahon sa dako nga bahin sang Luzon sa weekend.
Apang bangod malayo pa sa Pilipinas, mahimo paman magbag-o ang hulag sini gani magbantay lamang sa dugang natun nga mga weather updates.
