Ginapangita pa sang Bacolod City Anti Mendicancy division sang Department Of Social Services & Development ang ginikanan sang lapsag nga babayi nga ginbun-ag sa bench sa gwa sang Andres Bonifacio Elementary School – 1, kagab-i.
Suno kay Anjeanette Servano program coordinator sang Bacolod City Anti Mendicancy division, nagtawag sa ila kagab-i ang Disaster Risk Reduction and Management Office (DRRMO) nga may ginrespondehan sila nga iloy nga nagbata sa bench sa gwa sang isa ka buluthuan.
Suno diri, gilayon nila ini nga ginpadulongan kag gindala ang iloy kag lapsag sa City Health Office.
Apang kaina sang aga nagtawag ang CHO nga wala na ang iloy samtang ang lapsag nabilin didto.
Suno kay Servano, ginabisitahan na nila humalin pa lamang sang tinalikdan nga bulan ang ginikanan kag nagpasalig man sila nga mahalin na sa area.
Wala nahibaloan nga nagabusong ang iloy bangod wala man ini nanugid kag indi man gilayon manotisyaran nga madako ang iya tyan, amo na lamang nga ginakakibot nila nga nagbata na ini.
Pahayag sini gina-alegar nga may problema sa paminsaron ang iloy amo nga indi ini estable kun maesturya apang gina-trace na nila ang pamilya sang iloy nga gina-alegar yara sa barangay Mansilingan.
Suno kay Servano, pagalantawon anay kun makasarang ang ginikanan ukon ang pamilya sang iloy mag-atipan sa bata antes ihatag ang kustodiya sa ila.
