Wala ginarekomendar sang pinuno sang Bacolod Traffic and Transport Management Department ang pagpagamit sa mga ginpalamalos nga traffic lights bisan sa mga suludlon nga Barangay.
Sa interview sang Bombo Radyo Bacolod kay BTTMD Officer in Charge Patrick Leonard Lacson, ginafollow-up na sini sa Bacolod Engineer’s Office ang pagbakal sang bag-o nga mga traffic lights.
Madumduman nga 11 ka mga traffic lights ang ginpamalos gikan sa mga intersections bangod sa pagmalfunctions.
Iban diri ang nagadungan siga ang pula kag green, kag kalabanan wala sang yellow light kag timer gani gulpyada lamang ang pagsaylo sang kolor kag indi makapreparar ang mga motorista.
Sa karun mga traffic enforcers anay ang nagadireher sang trapiko sa mga ginkuhaan sang traffic light.
Nagsuhestyon si Bacolod City Mayor Alfredo “Albee” Benitez, nga ang ginpamalos nga traffic lights ang ipagamit na lamang sa iban nga mga Barangay nga naga-eksperyensya sang mabug-at nga trapiko.
Apang, gintindugan ni Lacson nga indi nagakadapat sa highly urbanized city ang gintawag sini dilapidated model sang traffic lights.
Gin-athag man sini nga wala niya ginacriticize ang nakaligad nga administrasyon, apang ang traffic lights nga ginbakal para sa ciudad ang indi pasar sa international standard.
Ginpasalamatan naman sini si Benitez nga naghatag sang pagtamod sa concern kag ginhatagan ini sang pondo.
Panugyan sini nga iscrap na lamang ukon taguon ang mga ginpamalos nga traffic lights.
Ini ang mahimo man nga ibaligya sa mga sugar centrals, para sa mga nagapasulod nga trucks apang bisan sa nasambitan nga purpose, indi kumbinsido si Lacson.
