Gincustody sang mga pulis ang isa sa mga lalaki nga naghagad sa lima ka tuig nga bata nga babayi nga ginreport nga namissing sa ciudad sang Talisay sang Lunes sang hapon kag diri na sa Bacolod nakit-an sang Martes sang kaagahon, July 2.
Ala-1:00 sang hapon sang Lunes, nagahampang si Danica kag iban nga mga bata sa dalan sa Brgy. Zone 10, Talisay City sang may nagpalapit nga tatlo ka mga lalaki kag sila ang gintanyagan sang dulce.
Duha diri ang menor de edad kag isa ang yara sa legal nga pang-edaron.
Suno sa kahampang ni Danica, gilayon sila nga nagpalagyo bangud sa kahadlok apang si Danica ang nag-upod sa tatlo.
Suno sa ila, may yara sang bitbit nga kutsilyo ang isa sa mga lalaki.
Ila gindala si Danica sa ciudad sang Bacolod kag kapin alas-2:00 na sang Martes sang kaagahon nakit-an si Danica sa unhan sang isa ka unibersidad sa La Salle Avenue, Brgy. Villamonte.
Sa interview sang Bombo Radyo kay Police Lt. Liza Fe Vingno, officer in charge sang Women and Children’s Protection Desk sang Bacolod City Police Office, padayon ang ila imbestigasyon kaupod ang Talisay City Police Station bangod nga nagalain-lain ang statement ni Danica.
Suno kay Vingno, si Danica ang yara na sa kustodiya sang iya amay.
Ang isa ka menor de edad nga bata nga lalaki ang na-claim na sang iya ginikanan, samtang ang isa naman ang yara sa Department of Social Services & Development (DSSD) sang Bacolod.
Samtang, ang isa naman ka lalaki nga suno kay Vingno naga-edad sang 40 anyos pasaka ang yara naman sa kustodiya sang Talisay City Police Station bangod nga didto natabo ang insidente.
Dugang pa ni Vingno, ang tatlo ka lalaki ang lunsay mga residente sang ciudad sang Bacolod nga nagbyahe padulong sa Talisay City.
