Positibo ang gobernador sa Negros Occidental nga pirmahan ni President Ferdinand “Bongbong” Marcos Jr. ang Negros Island Region Act, apang luyag lamang sini nga maplantsa ang tanan agud maseguro nga ini ang magamadinalag-on.
Madumduman nga kahapon, kasunod sang pagtambong sa ceremonial energization sang Cebu-Negros-Panay 230 kilovolts backbone project sang National Grid Corporation of the Philippines (NGCP), ginkumpirmar ni Presidente Marcos nga pirmahan sini ang hagna agud mangin isa na lamang ka rehiyon ang Negros Island.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, positibo ang ginbuy-an nga pasalig sang Presidente apang indi man ini dapat dalion bangod luyag sini nga mahitso ang tanan partikular na ang budget para sa pagtukod sang Negros Island Region.
Bilang isa sa mga mangin opisyal sa NIR, ginapasalig sang gobernador nga tinguhaan sang Negros Occidental, Negros Oriental kag Siquijor nga mangin progresibo ang Rehiyon.
Aminado si Lacson nga madamo pa sila sang pangatubangon nga kabudlayan apang pasalig sini nga indi maghinulsol ang Presidente, mga Kongresista kag Senador sa ila desisyon nga pagsuporta sa pagtukod sang Negros Island Region.
Ginalauman na sang gobernador nga tinuig pa antes mangin estable ang rehiyon, kaangay sang ini ang ginpasar bilang Executive Order sadto kun sa diin sila ang naghulam pa sang mga personnel, kag mga opisina.
May-ara na sila sang nakita nga 25 hectares nga duta sa ciudad sang Talisay nga mahimo tukuran sang Regional Centers, apang nagapati ini nga bisan 10 hectares lamang ang sobra na bangod tulungaon man ang mga Regional Offices sa tatlo ka probinsya.
Paathag ni Lacson nga siya ang nakabisita sa General Santos City sang didto ginpatigayon ang Governor’s League, siya ang ginlibot sa 11 hectares nga Regional Centers kun sa diin yara na sa lugar ang mayorya sa mga regional offices sang mga ahensya sang gobyerno.
Nagalaom si Lacson nga antes ang State of the Nation Address (SONA) sang Presidente mapirmahan na sini ang Negros Island Region.
