Proud ang coach sa Romanito Maravilla Sr. National High School matapos parehas nga makuha ang bulawan nga medalya sa Long Jump Secondary Boys kag Girls sa Negros Island Region Athletics Association Meet 2026 para sa Bacolod City.
Nakuha ni Aliah Bree Diocson ang bulawan sa Long Jump Secondary Girls, samtang si Jem Mark Flores naman ang nakakuha sang gold sa Long Jump Secondary Boys.
Sa interview sang Bombo Radyo Bacolod kay Coach Miguel Arca, worth it ang tanan nga practice sang mga atleta.
Ang mga may-ara pa sang finals ang hatagan naman nila sang tyansa nga makapahuway, samtang i-correct naman nila ang slight errors sang mga humalampang.
Isa sa pahanumdom sang coach sa mga atleta ang “Hardwork beats Talent.”
Nagalaom sila nga makapauli pa sang dugang nga gold medals sa masunod nga mga events.
Ang Athletics ang nagsugog alas-6:00 kaina sang aga, apang ginpauntat ang mga outdoor events alas-10:00 sang aga bangod sa narecord nga 40 degrees Celsius nga Heat Index.
Sa karun, ang Bacplod City ang may-ara na sang duha ka gold medal kag isa ka silver medal, ang Negros Occidental ang may isa ka Silver Medal kag isa ka Bronze Medal, samtang ang Guihulngan City ang may-ara naman sang isa ka Bronze Medal….Tuman naman ang kalipay sang mga atleta gikan sa Romanito Maravilla Sr. National High School matapos mahakot ang gold medal sa Long Jump Secondary Boys kag Girls sa Negros Island Region Athletics Association Meet 2026 para sa Bacolod City.
Sa interview sang Bombo Radyo Bacolod kay Jem Mark Flores, 17 anyos, may triple jump pa ini nga pasakupan bwas sa aga.
Ginapreparahan gid sini nga makuha ang kampeonato para sa ila nga team.// Suno kay Flores, apisar naga ulan ukon init, sila ang padayun sa pagtrain gani para sa iya “worth it” gid ang iya pagtinguha.
Nagaserbe man sini nga inspirasyon si Coach Miguel Arca, nga miyembro sang Philippine Team.
Suno kay Flores, handom man sini nga makabahin sa Philippine Team pila ka adlaw.
Sa pihak nga bahin, naghilibion naman sa kalipay si Aliah Bree Diocson, Grade 7, matapos masungkit ang bulawan sa Long Jump Secondary Girls.
Suno diri, tuman ang kuba-kuba sang iya nga dughan matapos magdaog bangod ini ang iya una nga kahigayunan nga makahampang sa Palarong Pambansa.
Ini man ang una niya nga pagcompete sa Regional Meet.
Gindumdom man sini ang pahanumdom sang coach nga dapat mapabilin ang kabakod sang dughan kag indi magpaminsar sang negatibo.
Nagahilibion ini nga nagapasalamat sa sakripisyo sang iya coach kasubong man sang iya ginikanan. Samtang…nagleave gid sa trabaho ang amay sang gold medalist sa Long Jump Secondary Boys nga si Jem Mark Flores, 17 anyos, estudyante sa Negros Island Region Athletics Association Meet 2026.
Sa interview sang Bombo Radyo Bacolod kay Manuel Flores, nagleave ini sa trabaho, apang siya ang wala nakaabot sa hampang sang iya bata nga ginpatigayon alas-6:00 kaina sang aga.
Ginakalipay naman sini nga siya ang wala gid mapaslawan sa iya nga bata.
Suno diri, siya kag ang iya asawa ang todo gid ang suporta sa ila bata, nga agot sa mag-ulutod.
Ginakalipay man sini nga wala gid ginpaslaw ni Jem Mark ang iya eskwelahan kag ang Bacolod City.
Suno sa amay, nakadaog naman sang gold sa nakaligad nga Western Visayas Regional Athletics Association Meet ang iya bata, kag naghampang sa Batang Pinoy sa General Santos City.
Suno diri, gintinguhaan gid sini makakadto sa hampang sang iya bata kag agud ini ang matsekyar, ilabi na nga nagadangat sa 40 degrees Celcius ang Heat Index.
