Ginatugyan na sang gobernador sang Negros Occidental sa mga local government units ang desisyon kun pahanugutan sang mga ini ang pagdungka sa ila mga pwerto ang mga foreign cargo vessels sa tunga-tunga sang pamahog sang coronavirus disease ukon Covid-19.
Suno kay Governor Eugenio Jose Lacson, bangud nagkalain-lain nga produkto ang ginadala sang mga foreign cargo vessels sa mga pwerto sa Negros Occidental, indi man sini luyag nga maapektuhan ang mga negosyo sa probinsiya.
Apang suno kay Lacson, kun magpahanugot ang isa ka LGU nga padungkaon sa ila mga pwerto ang mga cargo vessels, dapat nga masunod gid ang mga protocols nga ginapatuman sang Department of Health (DOH) samtang nagapangatubang sang Covid-19 scare.
Nahibaluan nga sang damlag lang, ginpaguwa ni Bacolod City Mayor Evelio Leonardia ang Executive Order No. 11 nga nagadumili sa pagdungka sang mga barko nagikan sa China, Hong Kong kag Macau sa pantalan sang ciudad bangud sa coronavirus scare.
