Aminado ang gobernador sang probinsya sang Negros Occidental nga bisan nagahimo sila sang tikang nga mapadasig ang paggwa sang resulta sang swab test, dose oras ang pinakadasig nga tion agud ipagwa ang swab test result.
Ini ang kasunod sang insidente sa banwa sang Valladolid kun sa diin nalubong na ang pasyente nga COVID suspect antes naggwa ang resulta sang COVID test kag ini ang negatibo sa virus.
Sa interview sang Bombo Radyo kay Negros Occidental Governor Eugenio Jose “Bong” Lacson, ginpahayag sini nga nabaton niya ang report angot sa natabo sa Valladolid District Hospital.
Suno diri, indi manami para sa pamilya kag nahangpan sini nga masakit ang natabo bangud ginpalubong gilayon ang pasyente nga COVID suspect.
Suno sa gobernador, may yara sang ginasunod nga protocol ang ospital nga malubong sa sulod sang 12 oras ang pasyente kun ini ang COVID suspect.
Suno kay Lacson, dapat mangin learning experience na ini sa tanan ang natabo sa Valladolid.
Ginpahayag man sini nga husto ang rekomendasyon sang ospital kun nagpositibo ang pasyente apang masubo bangud nagnegatibo ini.
Iremind man sini ang mga health workers sang probinsya nga indi pagkalimtan ang mangin compassionate kag mangin pasensyoso sa trabaho.
