Nagpapanaog sang Executive Order si Negros Occidental Governor Eugenio Jose “Bong” Lacson nga nagamando sa tanan nga magsuksok sang facemask kun yara sa pampubliko nga lugar.
Santo sa EO No. 20-22 series of 2020 nga ginpirmahan ni Lacson kahapon, obligado na ang tanan nga magsuksok sang facemask bisan diin ini magkadto effective immediately.
Ang nasambit nga mando ang magapabilin nga epektibo until further notice.
Gina-engganyo ang tanan nga mag-usar sang reusable facemask nga makatabon sa ilong kag baba sang isa ka tawo.
Mahimo nga makagamit sang cloth mask, bandana, surgical mask kag iba pa.
Ang magabayolar sa nasambit nga EO ang magapangatubang sang penalidad nga nakasaad sa Section 10 sang Republic Act No. 11332. Samtang, nag-issue man sang executive order si Bacolod City Mayor Evelio “Bing” Leonardia nga nagamando sa tanan nga Bacolodnon nga magsuksok sang facemask sa tanan nga pampubliko nga lugar sa ciudad.
Santo sa EO No. 27 series of 2020, nakasaad diri nga obligado ang tanan nga magsuksok sang disposable ukon reusable facemask sa tanan nga public places sa Bacolod.
Gina-engganyo man ang tanan nga magsuksok sang facemask sa sulod sang ila mga panimalay.
Lakip sa mga facemask nga pwede magamit amo ang surgical mask ukon ano man nga reusable ukon disposable mask nga himu sa tela ukon breathable material nga makatabon sa baba kag ilong sang isa ka tawo.
Ang magalapas sa nasambit nga mando ang may yara sang pangatubangon nga penalidad.
Ang nasambit nga EO ang ginpapanaog ni Leonardia kagab-i kag epektibo ini gilayon.
