Ginpahayag sang gobernador sang Negros Occidental nga mas importante sa karun ang pagduso agud nga makakuha sang pondo para sa implementasyon sang RA 12000 ukon ang Negros Island Region Act sa 2025.
Suno kay Govenor Eugenio Jose Lacson, mahimo ikunsiderar ang pagbutang sang Siquijor sa pangalan sang rehiyon apang sa karun, ang mas importante amo ang pagdihon sang Implementing Rules and Regulation ukon IRR agud nga makakuha na sang budget para sa rehiyon.
Suno kay Lacson, dapat mahangpan nga napasar na ang layi para sa Negros Island Region kag indi madali ang pagligwat sini.
Suno sa gobernador dapat nga unahon nga mangin functional ang bag-o nga rehiyon.
Sa karun dapat iduso ang pagkuha sang pondo agud nga maplastar na ang mga regional offices sang ahensya sang gobyerno sa Negros Island Region.
Nagapati man ang gobernador nga sa ulihi mahimo nga maligwat man ang pangalan sang Negros Island Region sa ginaduso nga Negros Island-Siquijor Administrative Region.
