Ginpriso sang maestro ang Grade 6 pupil nga babayi nga ginpasibangdan sini nga nangawat sang iya kwarta sa Kinabong 2 Elementary School sa Brgy Igmaya-an, banwa sang Salvador Benedicto, Negros Occidental.
Nagpadulong sa estasyon sang Bombo Radyo Bacolod ang 11 anyos nga si Fatima kaupod ang iya bayaw para ireklamo ang Grade 3 adviser nga si Ranil Palabrica.
Suno kay Fatima sang Agosto 27, siya ang ginpatawag ni Palabrica alas- 3:00 sang hapon kag gindala sa sleeping quarters sang buluthuan kag didto ginpaako sang iya ginhimo nga pagpangawat.
Apang, suno kay Fatima wala ini nag-ako bangod nga wala sini ginkawat ang masobra P900 nga kwarta sang maestro nga suno diri nadula alas- 12:00 sang kaagahon kun sa diin sadto nga tion si Fatima ang yara sa ila balay nagatulog.
Dugang pa sini, yara man sa kwarto ang adviser sini nga si Jennel Ribatado nga naghambal sa iya nga mag-ako na sang iya sala.
Siya ang ginhambalan sang duha ka manunudlo nga indi ini nila pagpapulion kun indi ini mag-ako sang sala samtang ginhambalanan naman sang iban nga mga manunudlo sanday Palabrica kag Rebatado nga papulion na ang bata bangod wala man ini sang sala.
Ginpreso sang duha ka manunudlo si Fatima humalin alas- 3:00 sang hapon kag siya ang ginpaggwa na lamang alas- 7:00 sang gab-i.
Pahayag ni Fatima, may yara pa sang apat ka mga lalaki nga ngabitbit sang armas-luthang nga nagabantay sa gwa sang kwarto kun sa diin ini ginpreso.
Siya pa ang ginhambalan ni Palabrica nga kun siya ang manugid siya ang patyon sang mga armado.
Nahibaluan naman nga indi ini ang una nga bes nga ginpreso si Fatima sang manunudlo sang Agosto 27 sang tinalikdan nga tuig.
Siya ang ginpreso sadto humalin alas- 3:00 sang hapon kag ginpagwa alas- 5:00 sang aga pagkasunod nga adlaw.
