Target sang Bacolod City Government nga matigayon sa Oktubre ang ground breaking ceremony sang 10,000 housing units para sa mga informal settlers sa ciudad.
Sang Setyembre 3, nagcomit si Department of Human Settlements and Urban Development (DHSUD) Secretary Jose Rizalino Acuzar nga magahatag sa Bacolod City sang pondo agud magtukod sang 10,000 housing units para sa mga informal settlers.
Suno kay Mayor Alfredo Benitez, ginalantaw sini ang kada unit ang nagabalor snag P800,000 tubtob P1 million.
Suno kay Benitez, sa karun ginadiskusyunan pa ang mangin desinyo sang mga units kag ang teknolohiya nga himuon.
Suno diri, tatlo ka mga sites ang patindugan sang mga units kag ini ang ginalakipan sang Purok Arao sa Barangay Vista Alegre, Brgy. Banago kag Barangay 8.
7,599 ka mga housing units ang igahamtang sa Vista Alegre; 2,268 sa Banago; kag 2,048 sa Barangay 8.
Suno sa alkalde, tinutuyo sini nga makahatag sang nagkalain-lain nga housing products para sa nagkalain-lain man nga sektor sa sosyodad.
Suno diri, ang ideya sang proyekto amo nga himuon ini nga affordable ukon barato depende sa kapasidad sang benepisyaryo.
Suno sa iya, lain gid kun may yara sang kontribusyon ang isa ka persona sa iya balay gani magahatag ang gobyerno sang option depende sa ila kapasidad.
Suno kay Benitez, ang labing una nga onsite housing program sa ciudad ang ginalauman nga mainugurahan sa bulan sang Oktubre.
