Ginpatigayon na kaina sang aga ang groundbreaking ceremony sang 5,000 housing units nga patindugon sa Purok Arao, Barangay Vista Alegre, ciudad sang Bacolod kag pagasayluhan sang verified nga informal settler family.
Ang groundbreaking para sa Pambansang Pabahay para sa mga Pilipino nga nagatarget nga makapatindog sang 10,000 ka housing units subong nga tuig ang ginpangunahan sang mga opisyales sang Bacolod City government kag Secretary Jerry Acusar sang Department of Human Settlements and Urban Development nga amo ang ahensya nga nagagasto sang nasambit nga proyekto.
Madumduman nga ginpatigayon sang tinalikdan nga bulan ang signing sang memorandum of understanding para sa nasambit nga proyekto.
Suno kay Bacolod City Mayor Alfredo Benitez, 5,000 ka mga units ang patindugon sa Purok Arao.
May patindugon man nga 5,000 units sa mga site sa Barangay 8 kag Barangay Banago kun sa diin 24 square meters ang floor area sang isa ka housing unit.
Ang Pambansang Pabahay para sa mga Pilipino ang ginapatigayon sa pila ka bahin sang pungsod kag nalakip diri ang Bacolod sa mga benepisyaryo kun sa diin 10,000 ka housing units ang patindugon subong nga tuig.
Target sang programa ang zero informal settler family sa tuig 2028 gani one million housing units kada tuig ang target nga mapatindog ukon 6 million sa sulod sang anom ka tuig.
Indi naman totally free ang balay kundi may bayaran ang verified nga benepisyaryo sini paagi sa PAGIBIG Fund.
Kaina sang aga, ginpatigayon man ang MOU signing sa tunga sang Victorias City government officials kag Department of Human Settlements and Urban Development para sa lain man nga proyekto nga patindugon sa ciudad sang Victorias.
