Ginpatigayon na kaina ang groundbreaking ceremony sang Bacolod City General Hospital sa Barangay Vista Alegre nga gin-establish sang Republic Act 11564.
Ang groundbreaking ang ginpangunahan ni Senate President Juan Miguel Zubiri, Bacolod City Lone District Rep. Greg Gasataya nga nag-author sang Senate kag House Bill nga magaestablish sang ospital, mga local officials sang Bacolod city government, kag mga opisyales sang DOH kag DPWH.
Ginalauman naman nga mahuman ang ospital sa tuig 2024.
Sa speech ni Zubiri, iya ginpahayag nga tion na ini agud nga magbalikid sa Bacolod kadungan sang pagdumom sang best memories niya sa ciudad sang tion nga diri ini nag-eskwela.
Suno sa senador, proud ini nga nagikan sa Negros ang ila nga roots gani tion naman agud nga makabawi.
Nagtinguha man ang senador agud nga mapainan sang dugang nga pondo ang pagpatukod sang Bacolod City General Hospital.
P600 million ang kabug-usan nga pondo para sa BCGH sa idalom sang General Appropriations Act kag nagcommit ang senador nga magpain sang dugang nga P200 million agud nga mahimo ini nga P800 million.
Ang groundbreaking ceremony subong nga adlaw ang isa ka patimaan suno sa senador nga ginaulikdan nila ang ikaayong-lawas sang mga pumuluyo.
Suno diri, indi malipod nga may mga pumuluyo nga indi makasarang magbayad sang bill sa ospital samtang gutok naman ang mga pasyente sa Corazon Locsin Montelibano Memorial Regional Hospital.
Bangud masobra tunga sa milyon ang populasyon sang Bacolod suno sa iya, tion na gid agud nga matukuran ini sang kaugalingon nga balay-bululngan agud nga madecongest ang mga pasyente sa CLMMRH.
Bangud sa BCGH suno kay Zubiri, nalipay ang mga health workers bangud may yara na gid sang institusyon nga makabulig sa mga pasyente kag mapaimprove ang healthcare system para sa tanan.
