All set na ang groundbreaking sang Bacolod City General Hospital nga pagatukuron paagi sa isa ka acta republica nga ginpirmahan ni forme President Rodrigo Duterte.
Sa interview sang Bombo Radyo Bacolod kay Bacolod City Lone District Representative Greg Gasataya, nakasugtan na nga patigayunon ang groundbreaking sa Setyembre 9, Biyernes, alas-9:00 ang takna sa aga.
Suno kay Gasataya, mangin dinapit nga bisita si Senate President Juan Miguel Zubiri sa seremonya.
Suno sa kongresista, wala man sang significance sa adlaw sang groundbreaking bangud ini lamang ang adlaw nga nakasugtan kag bakante ang schedule nga magtambong sa event.
Ang Bacolod City General Hospital ang pagatukuron sa Barangay Vista Alegre syudad sang Bacolod nga malapit sa highway sang Barangay Mansilingan.
Ginalauman nga matapos ang construction sang ospital sa sulod sang tatlo ka tuig kay mangin operational sa ulihi nga binulan sang tuig 2024.
Suno kay Gasataya, ang P200 million nga yara sa hagna nga gin-author ni Senate President Juan Miguel Zubiri ang gin-award na sang Department of Public Works and Highways (DPWH) sa nagdaog nga contractor para sa land development kag pagatukuran sang ancillary buildings sang ospital.
Samtang, ang P250 million nga budget ang para sa construction sang main building sang ospital.
Ang contractor sang ospital para sa ancillary buildings sang ospital ang nagikan sa syudad sang Iloilo.
Suno sa kongresista, ang national agencies ang incharge sa construction sang ospital kag mga equipment.
Sa tion nga mahuman na ini, iturn-over ang ospital sa syudad sang Bacolod kag ang syudad na ang mapalakat sang operasyon sang ospital.
Ang duta nga patindugan sang ospital ang gindonate sang pamilya Gensoli nga may kalaparon nga 4.5 hectares.
