Nagpanindugan ang grupo sang mga manunudlo sa Bacolod nga indi na kinahanglan sang Department of Education ang P150 million nga intelligence funds nga ginapangayo ni Vice President kag DepEd Sceretary Sara Duterte.
Suno kay Richard Gelangre, presidente sang Bacolod City Public School Teachers Federation, kulang ang classrooms, mga bangko kag mga manunudlo apang wala sang naplastar nga solusyon para diri ang DepEd secretary kadungan sang hearing sang committee on appropriations sang Kamara.
Kun gastuhon naman ang P150 million sa bilog nga school, masobra P1 millon ang magasto kada adlaw nga wala sang auditing.
Apang indi maintindihan sang mga manunudlo kun ngaa kinahanglan pa ang confidential funds sa DepEd.
Suno diri, yara ang Philippine National Police agud nga magsolbar sang krimen samtang yara naman ang Armed Forces of the Philippines kun insurhensya ang problema.
Kun may naghimo sang kriminalidad suno kay Gelangre, yara naman ang mga pulis agud nga magdakop sa mga suspetsado samtang ang AFP ang in-charge sa mga rebelde.
May kaugalingon naman nga intel funds ang Office of the Vice President nga nagadangat sa P500 million.
Panindugan ni Gelangre, madamo ang mga problema sang mga manunudlo angot sa resources sa mga eskwelahan bangud kulang ang maintenance and other operating expenses.
Indi naman ang una nga kahigayunan nga may yara sang intel fund ang DepEd nga wala ginacheck sang Commission on Audit.
Suno diri, madamo sang mga nagahimo sang krimen nga dapat panilagan sang intel community agud nga sila ang mapasabat sa layi.
