Nagapasalamat ang grupo sang mga manunudlo sa ciudad sang Bacolod nga hatagan sila gihapon sang P1,000 nga cash incentive kadungan sang National Teachers Month.
Sa interview sang Bombo Radyo kay Richard Gelangre, presidente sang Bacolod City Public School Teachers Federation, nagapasalamat ang mga ini nga padayunon gihapon ang paghatag sang incentive nga nagsugod sang tuig 2018.
Apang mas labi sila nga magapasalamat kun madugangan kuntani ang sweldo sang mga manunudlo bangud mas manubo ini sa karon sa poverty threshold nga P33,000 kada bulan para sa pamilya nga may lima ka miyembro.
Suno diri, P25,000 ang gross income sang Teacher 1 apang P18,000 lang ang take-home pay sini kun wala ini sang kautangan, samtang kadam-an naman ang may P5,000 nga net take home pay.
Bangud tuman kakulang ang P5,000 suno kay Gelangre, nagapangutang ang mga manunudlo.
Kun madugangan ang sweldo sang mga manunudlo suno sa iya, makalagas na ini sa poverty threshold nga masobra P30, 000.
Suno sa principal sang Bacolod City National High School, indi reyalidad ang poverty threshold nga gintalana sang gobyerno nga P12,000 ang poverty threshold.
Kadungan sang National Teachers Month, nagalaom ang grupo nga mahatagan sang pagtamod sang gobyerno ang sitwasyon sang mga manunudlo bangud may mga tinion nga sila pa ang nagabakal sang pamahaw sang ila estudyante nga wala sang balon.
