Plano sang Samahan ng mga Taxi Drivers sa Bacolod City nga magpadala sang sulat kay president Ferdinand ‘Bongbong’ Marcos Jr sa panawagan nga mahatagan man sang fuel subsidy ang mga taxi drivers kag operators.
Sa interview sang Bombo Radyo kay Ronald Allan Pelaez Salgado, leader sang Samahan ng mga Taxi Drivers sa Bacolod City, may sulat sila nga ipadala kaupod ang Taxi Operators of Negros Occidental (TONO) para sa presidente kag Land Transportation Franchising and Regulatory Board (LTFRB), Department of Social Welfare and Development (DSWD), kag Local Government Unit sang Bacolod City.
Suno diri, dismayado sila sa pag-implementar sang fuel subsidy sang LTFRB kag DSWD.
Suno kay Salgado, madugay na nga naga-operate ang taxi sa ciudad sang Bacolod kag ginpangabudlayan nila ang pagproseso sang mga papeles nga kinahanglanon sa pagbyahe apang tubtob sa karun wala pa sila sang may nabaton nga ayuda kag may iban pa nga colorum ang nakakuha sang subsidiya.
Panawagan sini nga nagapamigado man sila sa pagpangabuhi kag may pamilya man sila nga ginapakaon.
Plano nila nga ipadala ang sulat sa Mayo 18 agud manawagan kag mapa-athagan kun may fuel subsidy gid man sila nga mabaton.
