Pasado na sa House of Representatives ang isa ka hagna nga may tinutuyo nga i-amend ang K to 12 basic education program kag magapahanugot sa mga estudyante nga magpili nagikan sa duha ka education pathways matapos nagraduate sa Grade 10 ukon 4th year high school.
Sa plenary session sang Martes, 200 ka mga kongresista ang nagboto in favor sa pag-aprubar sa third and final reading sang House Bill 11213 ukon ang proposed Education Pathways Act.
Tatlo ka mga kongresista ang nagboto nga nagpamatok diri kag wala naman sang may nag-abstain.
Ang hagna ang nagapropose nga mahatagan ang mga estudyante, nga nakatapos sang junior high school, sang option nga magkuha sang two-year University Preparatory Program kun luyag nila nga i-pursue ang college education ukon ang Technical Vocational Program.
Ini ang nagahatag man sang advanced placement exam, kun sa diin boluntaryo nga makuha sang Grade 10 nga mga estudyante kag kun mapasar, magahatag sa ila sang eligibility nga mag-enroll sa ila ginpili nga college degree matapos ang school year, kag indi na kinahanglanon nga makompleto ang Grades 11 kag 12 sa idalum sang University Preparatory Program.
