Ginkumpirmar sang Environmental Management Bureau (EMB) Region 6 nga naglab-ot na sa Bacolod City kag Negros Occidental ang haze nga halin sa nagapadayon nga masangkad nga forest fires sa Indonesia.
Ang haze ang ginalakipan sang aso ukon smog nga ginaupdan sang tuman ka pino nga yab-ok kag light vapor nga nagatinir sa kahawaan gani delikado ini sa ikaayong-lawas.
Sa interview sang Bombo Radyo Bacolod kay EMB Region 6 director Atty. Ramar Neil Pascua, hinali lang nagsaka ang fine particulate matter sa ciudad, santo sa data sang PM10 air quality monitoring station sa Bacolod.
Sang Martes, 13 micrograms per normal cubic meter ang fine particulate matter apang hinali ini nga nagsaka sa 150 micrograms per normal cubic meter kahapon.
Paathag ni Pascua, yara pa sa normal range ang fine particulate matter sa ciudad apang tubtub 150 micrograms per normal cubic meter lang man ang safe level sa Negros Occidental.
Aminado si Pascua na indi matumod sang air quality monitoring station ang types of pollutants bangud nagatakos lamang ini sang kadamuon sang pollutants apang dako ang posibilidad suno sa iya nga nakalab-ot na diri ang haze halin sa Indonesia bangud apektado naman ang Cebu.
Bangud sini, nag-abiso ang EMB director sa publiko nga magsuksok sang face mask agud indi maka-inhale sang mga pollutants.
Suno kay Pascua, mahimo nga mag-penetrate sa dugo ang fine particulate matter bangud tuman ini kagagmay gani mas maayo nga maghalong indi lamang ang mga asthmatic, nagabusong kundi ang tanan nga mga residente.
