Nagdangat sa 12 ka mga Local Government Unit sa probinsya sang Negros Occidental ang nagsuspend sang klase kahapon bangud sa mataas nga heat index.
Suno kay Irene Bel Ploteña, pinuno sang Negros Occidental Provincial Disaster Management Program Division (PDMPD) santo sa ila nabaton nga impormasyon may eskwelahan sa probinsya nga nagpatuman sang class suspension bangud sa tuman ka taas nga heat index.
Suno kay Ploteña, ginalauman subong nga adlaw ang mas mataas nga heat index nga nagdangat sa 42 degree celcius apang ginahulat nila sa karun ang forecast sang PAGASA bangud nagalain man ini adlaw-adlaw.
Ginpahayag pa sini nga santo sa forecast, tubtob sa Agosto pa maeksperyensyahan ang mainit nga panahon apang may yara man sang nakita nga posibilidad sang La Niña sa tion nga magsulod na ang habagat season.
Nagpanugyan ang PDMPD head nga limitahan ang mga outdoor activities umpisa alas 10:00 ang takna sa aga tubtob alas 3 sang hapon, agud malikawan ang epekto sang tuman nga kainit nga panahon.
