Ginpanginwala sang hepe sang La Carlota City Police Station nga sa syudad sang La Carlota naghalin ang supply sang illegal nga druga nga nagdangat sa balor masobra P8.5 million nga nakuha sa duha ka mga suspetsado nga nadakpan sa ginpatigayon nga buybuyst operation sang City Drug Enforcement Unit sang Bacolod City Police Office (BCPO-CDEU) sang Huwebes sang aga.
Madumduman nga ang mga suspetsado ang ginkilala nga sanday Alvin Cristales, 27-anyos kag kaupod sini sa balay nga si Regina Escosio, 44-anyos, lunsay mga residente sa Purok Lison, Barangay 1, Bacolod City.
Santo sa impormasyon nga nakuha sang CDEU, sa La Carlota pa ginkuha ang iligal nga droga kag gindul-ong diri sa syudad sang Bacolod.
Suno kay CDEU head Police Lt. Joven Mogato,, mahimo nga preparasyon na ini para sa MassKara Festival.
Si Cristales suno sa CDEU head ang nagadistribute sang shabu samtang si Escosio naman ang nagatago sang supply.
Sa interview sang Bombo Radyo Bacolod kay Police Lt Col. Lowell Garinganao, ginpanindugan sini nga indi matuod ang nakuha nga impormasyon bangud nangin meeting place lamanga ang syudad sang La Carlota.
Dugang pa sini nga santo sa monitoring, wala sang nakuha nga binulto nga shabu sa syudad gani nagapati ini nga mahimo sa syudad sang Bacolod kag malapit diri nga mga syudad kag banwa nagahalin ang supply sang illegal nga droga.
Samtang suno naman sa investigation agent III sang Philippine Drugs Enforcement Agency (PDEA) Negros Occidental, nagatutok ang mga ini sa monitoring.
Suno kay Jyxyvzcky Escrupulo, bisan sin-o man nga law enforcement agency ang makakuha sang dalagko nga bulto sang suspected shabu ila ini ginapasalamatan, bangud indi na makadangat sa street level individual ang iligal nga droga.
Aminado ini nga mangin mabudlay na ang pagmonitor sang PDEA sa mga aktibidad angot sa illegal nga druga kun ini ang yara na sa mga kamot sang mga street level individual.
