Tuman ang kalipay kag pag-pasalamat sang himata sang 7 anyos nga bata nga babaye nga gin-patay sa syudad sang Victorias matapos nadakpan na ang suspek kahapon sang hapon sa banwa sang Ajuy sa probinsya sang Iloilo.
Sa interview sang Bombo Radyo Bacolod sa lola sang biktima nga si Alma Didal, ginsabat gid sang Ginoo ang ila pangamuyo nga madakpan na ang suspek nga si Mark Besa nga amo ang nag-patay sa iya apo nga 7 anyos.
Suno sa iya, nahatagan na gid man sang hustisya ang iya apo kag ang ila bug-os nga Pamilya bangud isa ka adlaw matapos gin-patay ang biktima, gilayon naman nga nadakpan ang suspek.
Wala naman napunggan ni Didal nga ipabutyag ang iya kaakig sa suspek sa diin iya ginpahayag nga luyag sini kuntani nga “kamatayon” man ang ipamatbat kay Besa kaangay sa ginhimo sini sa biktima nga gin-himuslan, gin-patay, kag gin-sulod sa sako kag gin-haboy sa basuran.
Dugang pa sini, magabalik kuntani sa Pamilya ni Besa ang iya ginhimo sa biktima.
