BACOLOD CITY – Ginakasubo sang mga residente sa Hinobaan, Negros Occidental ang pagkamatay ni Police Supt. Arnel Arpon, hepe sang Guihulngan City Police Station, sa nagluntad nga ambush sa Barangay Magsaysay sa amo nga ciudad, Biyernes sang aga.
Si Arpon ang naga-istar sa Barangay II, Poblacion, Hinobaan matapos nakapangasawa sang taga-Barangay Asia sa amo nga banwa kag sila ang may yara sang apat ka mga anak nga lunsay mga lalaki.
Sa interview sang Bombo Radyo kay Hinobaan Mayor Ernesto Estrao, ginpahayag sini nga nagakasubo ang mga residente sang banwa bangud nadula ang isa ka mapainubuson kag low profile nga pulis.
Nanugon suno sa iya ang mga taga-Hinobaan bangud kasunod sang ambush, napatay ang pinakauna kuntani nga heneral sang pulis nga magahalin sa ila banwa.
Apisar wala nakaserbe sa Hinobaan Municipal Police Station si Arpon, kilala naman ini sang alkalde bilang isa ka matarong nga pulis.
Sa karun, nagkadto na sa Guihulngan City ang pamilya ni Arpon agud sugaton kag dal-on ang bangkay sini sa ila nga balay sa Hinobaan.
Si Arpon ang nagserbe nga chief of police sang Sipalay City kag Bago City sa Negros Occidental antes nadestino sa Guihulngan City, Negros Oriental.
Kaangay sang mga taga-Hinobaan, nanugon man ang mga taga-Guihulngan sa pagkadula sang hepe nga nakaupod nila sa sulod sang pila pa lamang ka bulan.
Si Arpon ang nagpasalipod pa kuntani sa patrol car apang bangud sa madamo nga pilas, siya ang napatay kaupod ang lima ka miyembro sang Guihulngan City Police Station kag ginkuha sang mga suspetsado ang ila mga armas matapos gin-ambush kahapon sang aga.
