Natalana nga hatagan pasidungog sang ciudad sang Silay ang tampad nga taxi driver nga nag-uli sang nabilin nga kwarta sang iya foreigner nga mga pasahero pinaagi sa Bombo Radyo Bacolod nagligad nga Pebrero 4.
Ginkumpirmar ni Silay City Mayor Mark Andrew Golez, nga sa flag raising ceremony nila subong nga aga, hatagan sang komendasyon ang taxi driver nga si Jhowny Camolista sang Brgy. E-Lopez, Silay.
Si Camolista ang nag-uli sang P175,000, $50 kag pila ka dokumento sang iya mga pasahero nga sanday Thomas Shick, 71-anyos kag Jutta Schick, 57-anyos, lunsay mga German nationals apang anom ka bulan na nga nagapuyo sa ciudad sang Sipalay.
Magluwas sa komendasyon, hatagan man sang P5,000 nga cash si Camolista kag ginkumpirmar ni Mayor Golez nga ang bata sini ang ginhimo na nga job order casual sang city government kag gintanyagan man ini sang house and lot sa Habitat for Humanity sang ciudad.
Apang suno kay Mayor Golez, kinahanglan lang nga makompleto sang bata ni Camolista ang mga rekisitos agud makaangkun ini sang balay sa Habitat for Humanity.
Suno sa alkalde, ang paghatag nila sang pasidungog kay Camolista ang para sa maayo sini nga binuhutan.
Madumduman nga nagsakay ang mag-asawa nga German kay Camolista gikan sa isa ka depot sa Talisay kag nagpadul-ong ang mga ini sa ciudad sang Bacolod sang nabilin sang mga ini ang ila bag nga may unod nga kwarta kag dokumento.
Gilayon naman nga ginturn-over ni Camolista ang bag sa Bombo Radyo Bacolod kun sa diin napakig-angutan ang mga tag-iya.
