Patay ang hooker ukon rigger matapos malapakan sang truck sa sugar transloading station sa Barangay Tapi, Kabankalan City, Negros Occidental.
Ang biktima ang ginkilala nga si Alexander Baguna, 61 anyos, residente sang Sitio Homesite, Barangay Camansi, Kabankalan City samtang ang driver sang truck ang ginkilala naman nga si Jerry Lintijas, 36 anyos, residente sang Barangay Mandu-ao, Bayawan City, Negros Oriental.
Sa interview sang Bombo Radyo Bacolod kay Police Captain Sammy Gasataya, deputy chief of police sang Kabankalan City Police Station, si Baguna amo ang nagaplastar sang tubo sa truck kag ginasecure ini sang kabilya agud indi madagdag sa byahe.
Matapos ang trabaho ini ang nagpahuway sa atubang sang truck.
Suno kay Gasataya, wala natalupangdan ni Lintijas nga sa atubang sang iya truck nagapulupahuway ang biktima gani iya ini nga ginpaandar.
Ginalantaw man ni Gasataya nga mahimo tulog si Baguna kag wala natalupangdan nga nag-andar na ang salakyan gani siya ang wala nakahalin kun sa diin nalapakan sang nawala nga royda sang truck ang iya nga ulo.
Nabatyagan man ni Lintijas ang pag-umpok sang salakyan, apang ini ang una nga nagpinsar nga siya ang nakalapak lamang sang bato ukon kahoy.
May-ara naman sang inisyal nga paghinun-anon sa tunga sang driver kag pamilya sang biktima.
