Patay ang isa ka human rights activist matapos ginluthang sa Sta. Maria Street, Eroreco Subdivision, Brgy. Mandalagan, ciudad sang Bacolod, kagab-i, Agosto 17.
Sa interview sang Bombo Radyo kay Police Major Richard Fajarito, station commander sang Bacolod Police Station 3, ginkilala ang biktima kay Zara Alvarez, 29 anyos, residente sang Cadiz City apang nagaboard sa Eroreco Subdivision.
Suno kay Fajarito, nagbakal sang sud-an kag papauli na kuntani si Alvarez sa iya nga boarding house sang ginluthang ini sang wala pa nakilal-an nga suspetsado.
Suno sa iya, posible nga ginsundan ang biktima kag matapos nga ginluthang, gilayon nga nagpadulong sa norte nga direksyon ang suspetsado kun sa diin nagahulat ang upod sini nga nagasakay sa motorsiklo.
Suno sa mga residente, una sila nga nakabati sang apat ka mga lupok kag ginsundan sang duha pa gid ka lupok matapos ang pila ka segundos.
Sa karun, suno sa station commander, padayon pa nga ginahibalo ang motibo sa krimen.
