Makabig nga kadalag-an sa kampo ni Vice President Sara Duterte ang pagbasura sang Quezon City Prosecutor’s Office sa assault complaint nga ginfile sang Quezon City Police District.
Madumduman nga si Duterte, pinuno sang iya security team kag iban pa ang ginpasakaan sang kaso sa gina-alegar direct assault, disobedience to authority kag grave coercion sa gintawag sang mga ini nga “forced transfer” kay Office of the Vice President chief of staff Zuleika Lopez sa isa ka pribado nga ospital.
Sa interview sang Bombo Radyo Bacolod kay Human Rights Lawyer Atty Ceasar Beloria, nagtaas na ang guidelines sang Department of Justice sa pagpasaka sang kaso.
Ini kaangay sadto nga nagakaigo na ang probable cause sa pagfile sang kaso, sa karun kinahanglan anay nga maseguro nga ang mga ebidensya ang may certainty of conviction.
Paathag ni Beloria nga yara pa lamang sa preliminary stage ang kaso batok kay VP Sara, apang bangod wala sang nagakaigo nga ebidensya ini ang ginbasura sang Prosecutor.
Ini bangod mabasura man gihapon ang kaso bisan magsaka sa korte.
Apang paathag sang Human Rights lawyer nga ini ang wala nagakahulugan nga natapos na ang kaso, bangod sarang gihapon nga makafile ang QCPD apang sila ang dapat anay magtipon sang nagakaigo nga ebidensya nga may certainty of conviction.
Suno kay Beloria, ang tanan nga criminal case nga may sentensya nga apat ka tuig, duha ka bulan kag isa ka adlaw pasaka nga pagkapriso ang required nga patigayunan sang preliminary investigation.
May kaangtanan sa isyu, ginapanindugan naman sang kampo ni Duterte ang kinamatarong sang pasyente sa pagpili sang ginasaligan nga medical institution.
Madumduman nga sadto, detained si Lopez sa House of Representative matapos gincite in contempt sa House Quad Committee Hearing angot sa paggasto sang budget sa Office of the Vice President.
