Ginpahalin ni President Rodrigo Duterte si Vice President Leni Robredo sa iya nga pwesto bilang co-chair sang Inter-agency Committee on Anti-Illegal Drugs (ICAD).
Ginpahayag ni Presidential Spokesperson Salvador Panelo nga gin-fire sang Presidente si Vice President Leni Robredo masobra duha ka semana matapos ang iya nga pag-appoint sa sini sa posisyon bilang anti-drug czar.
Suno kay Panelo, ang pag-appoint kay Robredo sa posisyon sa ICAD ang pamaagi agud mag-ugyon ang administrasyon kag oposisyon batok sa pagtapna sa illegal nga druga apang gin-usikan lang ni Robredo ang ini nga oportunidad.
Suno sa iya, gingamit sang bise-presidente ang iya nga posisyon agud atakehon ang mga pamaagi nga ginaubra sang administrasyon.
Gindugang man sini nga sarang gid ni Robredo nga makig-angot kag mag-istorya kay Duterte nahanungod sa iya nga posisyon apang wala gid ini sang may gin-ubra.
Masobra duha na ka semana nga gin-apoint ang bise-presidente bilang ICAD-chairperson apang suno kay Panelo, wala pa ini sang may napresentar nga programa batok sa illegal nga droga.
Ginpakamalaot man sang presidente ang kapabilidad ni Robredo bilang co-chair sang ICAD kag ginpahayag sini nga ang mga kaangay ni former Senators Francis “Chiz” Escudero ukon Ferdinand “Bongbong” Marcos Jr. ang mas nakaangay sa nasambit nga posisyon.
Ginpanginwala ni Presidente Rodrigo Duterte nga nagpangayo ini sang pasaylo kay Vice President Leni Robredo sa pagpati sa fake news nga gin-imbitaran sini ang United Nations officials nga imbestigaran ang kontrobersyal nga war on drugs sang Duterte administration.
Madumduman nga sang Sabado nagpangayo sang pasaylo si Duterte matapos ma-realisar nga sala ang mga nagagwa nga balita nga nag-imbitar si Robredo sang mga UN officials agud imbestigaran ang pungsod.
Gin-athag ni Presidential spokesman Salvador Panelo nga nagapangayo lamang sang pasaylo ang presidente sa pagpati sa sala nga impormasyon.
Nahibaluan nga ginapakamalaot sang Malacanang si Robredo bilang co-chair sang Inter-agency committee on anti-illegal drugs (ICAD) bangud sa pagpakighinun-anon sini sa mga opisyal sang United States embassy kag United Nations.
Gina-respeto sang Philippine Drug Enforcement Agency (PDEA) ang desisyon ni Presidente Rodrigo Duterte nga pahalinon si Vice President Leni Robredo bilang co-chair sang Inter-agency committee on anti-illegal drugs (ICAD).
Suno kay PDEA chief Aaron Aquino, ang desisyon sang presidente ang indi maka-apekto sa target sang PDEA nga tapnaon ang iligal nga druga sa pungsod.
Nahibaluan nga sa idalom sang Executive Order No. 15, si Aquino lamang ang nagaisahanon nga chairperson sang ICAD.
Apang, sang nagligad nga Nobyembre 6, ginbutang ni Duterte si Robredo bilang co-chair matapos tawgon sang bise presidente nga ‘failure’ ang war on drugs sang administrasyon.
Kahapon, ginkakas sang presidente si Robredo sa iya nga posisyon sa ICAD bangud sa madamo nga rason lakip na ang gina-alegar kakulang sang ginahimo sini nga tikang para sa problema sa iligal nga druga subong man ang ginapahayag motibo sini agud “i-politicize” ang isyu.
Samtang, ginpasiguro sang Philippine National Police (PNP) nga magapabilin sila nga “relentless” sa ila kampanya batok sa iligal nga druga kasunod sang pagkakas kay Vice President Leni Robredo bilang co-chair sang Inter-agency committee on anti-illegal drugs (ICAD).
Ini ang nangin pahayag sang PNP kasunod sang kumpirmasyon ni Executive Secretary Salvador Medialdea nga ginsesante na ni President Rodrigo Duterte si Robredo bilang co-chair sang ICAD.
Madumduman nga ginbaton sang bise presidente ang posisyon sang Nobyembre 6, isa ka adlaw matapos siya ginbutang ni Duterte bilang co-chair sang anti-drugs body kaupod si Philippine Drug Enforcement Agency chief Aaron Aquino.
Antes ang iya appointment, gintawag ni Robredo nga ‘failure’ ang war on drugs sang administrasyon nga nagtulod naman kay Duterte nga ibutang ini nga in-charge sang kampanya.
