Ginapanindugan sang Office of the Prosecutor sang International Criminal Court (ICC) nga ang korte amo ang insakto nga lugar sang tanan nga legal arguments.
Ini kasunod sang nangin pahayag ni Atty. Nicholas Kaufman, legal counsel ni Former President Rodrigo Duterte, nga indi matuod, “sensational” ang media coverage kag politically motivated ang paglakip sang mga pangalan nanday Senators Ronald “Bato” Dela Rosa kag Christopher Lawrence “Bong” Go, amo man ang pila ka mga anay gabinete kag police officials, sa dokumento nga ginpagwa sang ICC nga amo ang mga ginaalegar nga co-perpetrators sa drug war sang termino ni former President Rodrigo Duterte.
Suno sa Office of the Prosecutor sang ICC, wala sila nagahatag sang komento sa lunsay spekulasyon.
Gin-athag sini nga nagatrabaho ang ICC nga independent, nagasunod sa layi ukon sang Rome Statute kag nagabase ang ila trabaho sa ebidensya.
Wala man nagahatag sang komento ang ICC sa nagapadayon nga imbestigasyon.
Nahibaluan nga natalana sa Pebrero 23 tubtob 27 ang hearing sang confirmation of charges ni Duterte sa Scheveningen Detention Center sa Netherlands.
Sa pihak nga bahin, indi magtambong si former President Rodrigo Duterte sa video conference sa iya confirmation of charges hearing, nga natalana nga magsugod sa Pebrero 23, suno sa iya defense counsel nga si Atty. Nicholas Kaufman.
Base sa ICC website, hiwaton sa Pebrero 23 ang confirmation of charges halin alas 10:00 sang aga tubtob alas 3:00 ang takna sang hapon, oras sa The Hague ukon alas 5:00 ang takna sang hapon tubtob alas 10:0 ang takna sang gab-i oras sa Pilipinas, sa Pre-Trial Chamber I sa Courtroom I.
Sa Pebrero 24 kag Pebrero 27 ang masunod nga mga hearing.
