Padayun ang pagpangita sang Bacolod City Veterinary Office sa stray dog nga madamo na sang nakagat sa palibot sang Bacolod City Public Plaza.
Sa interview sang Bombo Radyo Bacolod kay Assistant City Veterinarian Dr. Janine Sarthou, may tatlo na ka mga nagpabakuna sa City Health Office nga nakadtan sang ido nga may kaparehas nga description.
Apang ginapahayag nga nagadangat na sa masobra pito ka tawo ang nakagat sang ido nga ginlaragway nga brown ang kolor, kag nagaki-ang ki-ang kun maglakat.
Panawagan ni Sarthou sa mga nakadtan nga magpabakuna sang anti-rabies sa City Health Office.
Ginalantaw sini nga agresibo ang ido bangod may ginabatyag ini nga kasakit, apang may posibilidad man nga may rabies ang nasambit nga ido.
Pahayag ni Sarthou nga nag-untat sila anay sang pag-impound sang mga stray dogs bangod over populated na ang ila impounding area.
Sa karun, may ginasagod nga 129 ka mga layaw nga ido sa impounding area sang ciudad.
Apang iprayoridad nila ang pagkuha sang ginapangita nga ido bangod ini ang nagahatag na sang halid sa komunidad.
