Nagapadayon sa karon ang imbestigasyon sang mga otoridad sa pila ka mga report sang fishkill sa Hilabangan River sa banwa sang Ilog, Negros Occidental.
Nahibaluan nga gindala ang water samples sa Negros Prawn Producers Cooperative sa cuidad sang Bacolod kag ginpaidalum sa analysis kon sa diin natukiban nga mataas ang chloride level sang tubig.
Sa interview sang Bombo Radyo Bacolod kay Punong Barangay Nicanor Lopez sang Barangay 2, Ilog, Negros Occidental, wala na sang dugang nga report sang fish kill ukon pagkalamatay sang mga isda apang nadulaan naman sang palangabuhian ang mga residente bangud nagkalamatay ang mga isda sa suba.
Suno kay Lopez, nakahinun-anon naman ini sa mga fisherfolks kag nagpahayag ang mga ini nga wala na sila sang sap-an bangud wala na sang isda.
Suno diri kun wala na sang palangabuhian ang mga residente, ginakahangaw-an naman nga ang sosyodad naman ang apektado.
Kaangay lamang nga magpangawat bangud wala na sang dakpon agud nga kaunon.
Suno sa Punong Barangay, ginapahayag nga mataas nga chlorine sa tubig ang rason nga nagkalamatay ang mga isda kaangay sang ulang, sili-sili kag kaiban pa.
Ginatugyan naman sini mga otoridad ang pagbinag-binag kun sa diin naghalin ang chloride nga nagpollute sa tubig sang suba kag pagtukib kun sa water district gid man ang nagikan ang nasambit nga chemical.
Lantawon pa ni Lopez kun ano nga assistance ang mahatag sang Barangay bangud sa karun nagaprangka ini nga wala gid sang mahatag nga assistance sa mga apektado.
