Tubtob sa karun, wala pa sa gihapon makita ang lawas sang 43 anyos nga iloy nga nalumos sa suba sa Purok Crossing Libertad, Brgy Ma-ao, Bago City sang Lunes sang hapon.
Madumduman nga una nga naanod sang daludo sang tubig ang 11 anyos nga bata nga babayi nga ginkilala kay Ma. Ella Gargasiran matapos nga maanod sa suba ang iya nga tsinelas samtang gintinguhaan naman ini nga masalbar sang iloy sini nga si Myra Gargasiran apang parehas ang mga ini nga gin-anod bangod sa mabaskog nga current.
Narecover ang bangkay sang bata kahapon sang hapon apang nagapabilin nga missing ang iloy.
Suno kay Dr. Merijene Ortizo, head sang Bago City Disaster Risk Reduction and Management Office (DRRMO), nausoy nila kahapon ang lima ka kilometros sang Ma-ao River gikan sa gintabuan sang insidente.
Ang survey search ang nag-umpisa alas-6:30 tubtob alas-11:10 sang aga samtang sila ang temporaryo nga nag-untat para sa pagpanyaga.
Wala gilayon ang mga ini nakabalik sa pagpangita matapos nga mag-ulan sa nabukid nga bahin kag mangin delikado sa mga rescuers gani nakabalik ang mga ini alas-2:30 sang hapon sang nag-untat na ang pag-ulan.
Paathag sini nga wala pa sila nakadangat sa kadagatan sa pagpatigayon sang search and retrieval operation bangod nagaconcentrate ang mga ini sa naibabaw nga bahin sang Ma-ao River.
Ginapanawagan ni Ortizo sa mga makakita sang lawas sang isa ka babayi nga ipahibalo sa Bago City DRRMO sa numero nga 0933-693-6444 ukon magmessage sa facebook page sang Bago DRRM.
