Patay ang 35 anyos nga iloy matapos magtabog kag mabunggoan sang salakyan sa National Highway, Brgy Punta Mesa, Manapla, Negros Occidental, kaina alas- 10:20 sang aga.
Sa interview sang Bombo Radyo kay PCapt Marion Vicente Villaflor, deputy chief of police sang Manapla Municipal Police Station, nagasakay sa tricycle ang iloy nga si alias Renalyn kag bata sini nga lalaki nga menor de edad samtang nagabyahe padulong sa sur nga bahin.
Ang tricycle ang ginamaneho ni alias Alejandro, 57 anyos, residente sang Brgy Tortosa, Manapla, Negros Occidental.
Suno kay Villaflor, nagsignal si alias Alejandro para magleft turn apang wala naman nakapangaman ang drayber sang Nissan Almera nga si alias Kenth, 33 anyos residente sang Brgy Bantayanon, Calatrava Negros Occidental kag nabunggoan sini ang likod nga bahin sang tricycle.
Bangod sa impact nagtabog sa pihak nga lane si alias Renalyn kag nabunggoan sang sugata nga Hyundai Sedan nga ginamaneho ni alias Nilo, 37 anyos, residente sang Victorias City,Negros Occidental.
Ginhingagaw pa dala sa ospital si alias Renalyn apang gindeklarar nga dead on arrival samtang pilason naman ang bata sini.
