Wala na nakadangat sa ospital agud magbun-ag sang iya bata ang isa ka menor de edad sa syudad sang Sipalay.
Sa pagpakig-angot sang Bombo Radyo kay Councilor Dionilo Bugtae, may nagtawag nga isa ka personnel sang rescue team sang syudad nga may yara sang 17-anyos nga babayi nga manugbata sa Brgy. Marikalum sa nasambit nga banwa.
Sa indi na gid maagwantahan nga kasakit, wala na nakalab-ot sa ospital ang iloy kag ini ang naalang-alangan sa tunga sang talamnan kun sa diin didto nalang siya nagplastar kag nagbun-ag.
Nahibaluan nga ang lugar nga kadtuan kuntani sang mga rescuers ang medyo mabudlay sudlon bangud malayo ini sa main road kag kinahanglan pa maglatay sa kahon.
Matapos nga nakabata sa talamnan ang iloy, gilayon naman nga gindala sang mga rescuers ang bag-ong bun-ag nga bata sa ospital agud masigurado ang iya nga estado.
Nagpangabay naman si Bugtae sa mga opisyal sang mga sentro sa kada barangay nga ila monitoron ang mga nagabusong agud indi na liwat matabo ang insidente.
Suno kay Bogtae, maayo lang ina kun aga matabo kay yara gilayon ang rescue team apang kun gab-i mabudlayan gid.
Yara naman sa karon sa estable nga kondisyon ang iloy kag ang iya baby girl.
Nahibaluan nga ini na ang ikaduha nga anak sang 17-anyos nga iloy.
