Nagapangayo sang hustisya ang pamilya sang 14 anyos nga Grade 9 student nga babayi nga ginaalegar ginhimuslan sa norte nga bahin sang probinsya sang Negros Occidental.
Sa interview sang Bombo Radyo sa iloy sang biktima, matapos sini nga mahibaluan ang natabo sa iya bata, gilayon ini nga nagpauli gikan sa Manila kun sa diin ini nagatrabaho.
Suno diri, sang iya ginpamangkot ang iya bata kun madumduman sini ang natabo, nagasabat lamang ang bata nga wala ini nakahibalo.
Gindala man sini ang iya bata para ipa-check up sa doktor kag didto na nakit-an nga may laslas ang iya pulso, amo man nga nahibaluan nga gintistingan sini nga utason ang iya kabuhi.
Madumduman nga may nakilala nga si certain Julian ang biktima sa isa ka group chat sa social media, nga amo naghagad sa iya nga maglagaw sa ila lugar para magtambong sa piyesta.
Naglakat ang biktima nga wala naglisensya kag pag-abot sa lugar may pa yara pa gid sang kapin sa pito ka lalaki si nga upod si Julian kag sila ang ululupod nga nag-inom sang makahulubog nga ilimnon.
Apang, si Julian ang ginsugat sang iya magulang kag nauna nga nagpauli, samtang ang biktima naman ang nagpabilin.
Sa video, makit-an nga may tatlo ka lalaki kun sa diin ang isa ang nagasampaw sa biktima, ang isa ang nagakuha sang video, kag isa ang nagalantaw.
Wala naman nakit-an sa video ang nawong sang biktima apang nakit-an ang nawong sang lalaki nga nagasampaw sa iya, samtang ang duha naman ang may tattoo.
Gintinguhaan man nga pangitaon ang mga suspek sa address nga ginhatag sang biktima apang wala sang may nakakilala sa ila.
Samtang, padayon naman ang pag-imbestigar sang kapulisan sa pagtumod sa mga suspek apang aminado man sila nga mabudlay ang ila pagtrabaho bangod sa limitado nga impormasyon nga nahatag sa ila.
