Nagapati ang iloy sang tatlo ka kabataan nga ginpangpanglampos sang bato sa sulod sang ila puluy-an sa Hacienda Badiang, Barangay E. Lopez, Silay City nga wala sang kahilabtanan ang barkada sang iya 15-anyos nga bata nga babayi sa natabo nga krimen bangud ini tanan ang iya nga kilala.
Sa interview sang Bombo Radyo kay Ronelyn Montañez Ansiano, iloy sang mga biktima, antes natabo ang krimen, alas-8:00 sang gab-i, nagtawganay pa sila sa iya tatlo ka mga kabataan.
Suno kay Ronelyn, adlaw-alaw ini nga naga-video call sa iya mga kabataan ilabi na sa 15-anyos nga babayi, kag ini man ang naga-update sa iya kun may-ara sila sang mga barkada nga magatambay sang ila nga balay.
Paathag sini nga kilala niya ang tanan nga iloy sang kada isa sa mga barkada sang 15-anyos, kag nagachat man ang mga barkada sini sa iya kag nagalisensya kun magtambay sa ila nga balay.
Dugang pa sini nga apisar ara ini sa luwas sang pungsod, wala siya nagkulang sa pagmonitor sa iya nga mga kabataan.
Pahayag ni Ronelyn nga masaligan ang iya nga bata bangud ini ang naga-open gid sa iya, kag wala man ini sang nasugid nga siya ang may nobyo.
Samtang, natalana nga ilubong sa maabot nga Domingo sa Silay City Public Cemetery ang bangkay sang siyam ka tuig nga babayi.
Ang apat ka tuig nga lalaki ang nagarecover naman, samtang ang 15-anyos ang padayon nga nagapaayo sa Corazon Locsin Montelibano Memorial Regional Hospital (CLMMRH).
